ehbk-albia

…Eta Bilbo kantuz bete zen #EHBK

Ikaragarria izan zen Euskal Herria Bilbon Kantari, Zazpiak Oihal batetik lelopean iragan larunbatean Bilboko kaleak kantuzalez bete zituen ekimenaren arrakasta. Iazko esperientziatik abiatuta, Bilboko Konpartsak, Euskal Herria Kantuz eta Euskal Kantuzaleen elkartea izan zituen antolatzaile, elkarlanean. Balmasedatik Eskiulara zabaldu zen Bilbora etortzeko deialdia, eta, horri erantzunda, Eibartik, Plentziatik, Donostiatik… Kantuzale taldeak etorri eta Bilbon bildu ziren. Bilboko kaleak, Abandokoak zein alde zaharrekoak jendez eta kantuz bete zituzten.

Euskal kantutegia berreskuratzeko eta kantuzaletasuna bultzatzeko ahaleginean dabil azken urteotan Bilbo Kantari ekimena, kalean, kalez kale eta tabernaz taberna, Zenbat Gararen Lagun Artean Kantari hilero Kafe Antzokian egiten den gisan, euskal kantutegia landu eta gaurkotu egiten du, aldiro liburuxka eguneratuz. Bilboko Konpartsek bultzada ederra eman diote kantuzaleen ekimen honi azkenaldion, eta emaitza da gero eta lagun gehiago biltzen duen hileroko hitzordua da. Larunbatekoa, berriz, deialdi nazionala izan zen, eta jendearen erantzuna… Mundiala!

Eguerdian, gehienek Kafe Antzokian, eta sartu ezinik geratutakoak Bilboko beste leku batzuetan bazkaldu zuten.

Arratsean, zazpi kaleetan zazpi geldialdi egin zituen ibilbideak, bakoitzean euskal herrialde bati aipamena egiteko. Balkoietatik kantuak eta azpian jende andanaren milaka ahotsek erantzuten…

Azkenik, Euskaltzaindiaren balkoitik Xabier Amurizaren ahotsak jarri zion amaiera hitzorduari… Biba güek!

Argazki gehiago Bilboko Konpartsen Flickr bilduman: eta bideo erreportajea EITB nahieran.

 

EHBilbonkantari (488x592)

“Euskal Herria Bilbon Kantari: Zazpiak oihal batetik”, larunbat honetan Bilboko kaleetan

Larunbat honetan, apirilak 5, “Euskal Herria Bilbon kantari” ospatuko da Bilboko Konpartsaken eskutik, eta jakina, Algara konpartsa han izango da. “Zazpiak oihal batetik” lelopeko ekimena arratsaldeko 18:00etan hasiko bada ere, eguerdiko 12:30ean kantujira egingo da, girotzen hasteko. Bilboko zabalgunetik, erdialdetik abiatuko gara, Albia lorategitik, eta 14:00etan Kafe Antzokian bazkalduko dugu (jada ez dago lekurik). Alde zaharreko Unamuno plazan musika jarri eta kantu-dantzan aritzeko aukera izango dugu bazkaldu ondoren. Eta 18:00etan, Unamuno plazan elkarretaratzea izango da. Bertan elkartuko gara kantuzale eta musikari guztiok “Zazpiak oihal batetik” ekimenean, eta Zazpi Kaleetatik kantujirari emango diogu hasiera. 21:00etan Plaza Barrian bukatuko da ekimena, kantu eta dantzekin.

Inauteriak 2014: Egurraldia!!!

Badatoz Inauteriak Bilbora, eta urtero bezala, Bilboko Konpartsek sekulako programazioa prestatu dute.

 

bilbokokonpartsak

Hasteko, apertibo gisa, otsailaren 23an, igandea, III. Inauterietako Pontxe eta Tostada lehiaketa egongo da Plaza Barrian, eguerdiko 12etatik aurrera ( bertan izena emateko aukera). Baina astebukaeran berriro elkartuko gara hainbat hitzordu garrantzitsutan: otsailaren 27an, osteguna, 19:30ean Farolin eta Zarambolasi epaiketa eta jarraian Trapuzaharrak kalejira, 20:30etan Plaza Barritik (trapu zaharrak ekarri ez dituztenentzat, bertan eskuratzerako aukera egongo da). Ostiral goizean umeentzako desfilea eta txokolatada egongo da, eta arratsaldeko 20:00etan Bilbo Kantari mozorratua aterako da Kalderapekotik, baina Algarakideok Gabriel Aresti euskaltegiko Inaute jaian dugu hitzordua ostiral osoan zehar. Zeuek ere gonbidatuta zaudete!

“Eta Jainkoak Bilbon duen zerbitzariak, martxoaren 1erako zabalduko ditu Bilboko Kale Nagusiko urak konpartsel tribuetako kideei, eta artean Algara konpartsa osatzen dugunoi, 10 urte deserrian egon eta gero”.  Bai, Kale Nagusian zehar egingo dugu konpartsa guztiok Inauterietako desfilea larunbatean, arratsaldeko 18:00etatik aurrera.  Horregatik, eta urtero legez, Kafe Antzokian elkartuko gara larunbat eguerdian Algarakideok, elkarrekin bazkaltzeko eta dena prestatzeko.

algarakonpartsa2

Konpartsen larunbateko programazioarekin jarraituz…

…lagun asko etorriko dira gurekin ospatzera desfilea: “Ze esatek”, “Tea Party dj-ak, “Lekittioko deabruekin” eta “Hortzmuga”  taldearen ikuskizun berezia, eta Marikalanbre, Martinbertso, Largabista, Ane Pirata eta Irrien Lagunakeko koadrila osoa, erraldoiekin batera, fanfarria, karrozak… eta parte hartu nahi duten guztiak!!! Aurtengo desfilean eskenatokiaren ondoan aniztasun funtzionala duten lagunentzako esparru bat gordeko dute Bilboko Konpartsek, den-denok disfrutatu ahal izateko.

Eta Inauteriak badoaz bukatzen, baina zita gehiago ditugu. Martxoaren 2an, igandea, Indaba lehiaketa egingo da Plaza Barrian, goizeko 9:00etatik aurrera. Eta Zazpi Kaleetatik goizean, eta arratsaldean Arriaga plazan, Zuberoako Maskarada izango dugu Gaztedi Taldearen eskutik. Martxoaren 3an, astelehena, umeentzako programazioa egongo da, eta amaitzeko, martxoaren 4an, asteartea, Sardinaren ehorzketa, 19:30etik, Plaza Barritik Arriagara.

Anima zaitez Inauteriak gozatzera gurekin!!!

Biba Pellot, Biba Festa!!!!!!!!

santa-ageda-algararekin

“Aintzaldu daigun Agate deuna…”

Otsaila hil berezia da euskaldunontzat, egutegiak zenbait festa garrantzitsu markatzen digu eta: San Blas, Santa Ageda, Inauteriak … Beraz, adi ibili, Algarakide, eta ederto pasatzeko prestatu! Gainera, ez ahaztu aurten gure konpartsak 20. urteurrena ospatzen dugula! Hasteko, otsailaren 4an, asteartearekin, Santa Ageda bezpera ospatuko dugu, urtero bezala kantuan, Kafe Antzokitik hasita eta Abandon zehar. Eguerdiko 13:00etan Beñat Ugartetxea eta Jon Arano bertsolariek lagunduko gaituzte, eta arratsaldeko 19:00etan Apolo eta Barandi lagunek bertsotan eta trikien doinuek ere. Eztarria tonuan jarri eta animatu gurekin abestera!

Anbotorako mendi irteera, bertan behera

Igande honetan antolatuta geneukan mendi irteera bertan behera geratu da, eguraldia dela eta. Izan ere, klima baldintzak ez ei dira onenak izango inguru horretatik ibiltzeko. Beraz, eguratsa apur bat hobea izan arte itxaron behar… Baina bitartean, ez gara eguraldia bezala goibelduko, ez horixe! Otsailean zehar, beste zita garrantzitsu batzuk markatzen baitizkigu egutegiak: santa Ageda, Inauteriak… Algararen 20. urteurrena ospatzeko aukera ezin hobeak. Laster izango duzu horren guztiaren berri.

Anbotorako mendi irteera

Zenbat Gara elkarte euskaldunaren eskutik eta 1994an sortua,  Algarak Zenbat Gararen filosofia eta ikuspegi soziolinguistikoa jai esparrura eramaten ditu jaio zenetik: ekimen gozagarri eta erakargarrien bidez erdaldunak euskarara hurbiltzea, ikasteko motibatzea, dakitenen erabilera sustatzea eta gure hizkuntzan bizitzeko aukera gauzatzea dira Algararen helburuak. Beraz, urte honetan zehar gure konpartsaren 20.urteurrena ospatuko dugu hainbat ekitaldiren eta jardueraren bidez eta ospatzen hasteko, hil honetan mendi irteera bat antolatu dugu urtarrilaren 26an, igandea, Anbotora igotzeko. Kafe Antzokitik aterako gara, goizeko 9:00etan. Animatuz gero, bete hurrengo formularioa, Biba Pellot, Biba mendia!!

algara2011

Algara bazkaria, azaroaren 23an, larunbata, Kafe Antzokian

Uda eta Aste Nagusia urrun geratu dira, eta hotza etorri bada ere, Algara konpartsa urte osoan zehar ibiltzen da festarako prest. Izan ere, udazkenero, Algarako konpartsakideok biltzen gara Bilboko jaiak elkarrekin gogoratzeko eta negua prestatzen hasteko: San Tomas, Inauteriak… Larunbat honetan, azaroak 23, dugu hitzordua, 13:30ean Kafe Antzokian, Ledesmara poteoan joateko eta ondoren, 14:30 aldera, Antzokiko goiko aretoan bazkaltzeko. Musika, kantak eta sorpresak ez dira faltako. Anima zaitez! Izena emateko, jo edo deitu gure bulegora. Eta ez ahaztu Algarako jantzia!!

Badoa Marijaia… Datorren urtera arte!

Ibaian behera eginez, suak hartuta joan zaigu Marijaia. Datorren urtean berpiztuko da, eta bitartean, guri atseden hartzea egokituko zaigu -txosna desmuntatu ostean-. Berriro ere jai bikainak izan ditugu, gorputzak ahal izan duen neurrian gozatu ahal izan dugu, jaia zer den ulertzen eta maite ez dutenak gorabehera.

Aurtengoa euskara modu naturalean galtzen ez direla aldarrikatzeko urtea izan da, baina telebistaren Aste Nagusia ere izan da: Algara barrutik ezagutu ahal izan dugu ETBn eta bertso saio didaktikoan barneratu gara Hamaika Telebistan. Ke makinarena, atxurrena, puxikena eta galdutako haurrena ere izan da aurtengo edizioa, denetarik pixkat.

Gure txosnako sukaldean Pellot bokata estreinatu dugu eta hezur-haragi-aparrezko Pellot etorri zaigu, animatzaile aparta!

Dantzan eta kantuan egin dugu, eta bapo jan dugu algarakideek prestatutako jateko gozoa. kazetariak, pelotariak eta futbolariak, euskalgintzako lagunak eta beste herrialde batzuetako bisitariak izan ditugu, kubatarrak eta kataluniarrak kasu. Ahalegin handia egin dugu programazioan gure txosnan ekitaldiak antolatzeko, eta jendeak estimatu du hori.

Baina Aste Nagusi hau, dudarik gabe, gure txupinerarena eta berarekin batera sarri ikusi dugun Iñaki lagunarena izan da. Biba zuek!

Orain, guztiz akituta egon arren, desmuntaketa, burdin eta ohol guztiak batu eta datorren urterako gordetzea “besterik ez” zaigu geratzen. Urtebete barru, berriro ere, Marijaiarekin batera gure Filibusti ere berpiztuko da eta han egongo da berriro Pellot.

Biba festa eta biba gu!

Mari, denon aurpegiekin osatutako Marijaia

Aste Nagusia herritarrek herritarrentzat eginiko jaiak dira, horrek bereizten ditu beste hainbat hiri eta herritako jaietatik. Jai-eredu partzehartzailea konpartsetan eta berauen lanean oinarritzen da. Erasoak eraso, bilbotarrok argi dugu Aste Nagusia maite dugula eta, babes hori irudikatzeko Zaindu maite dozuna kanpainia egin dugu Bilboko Konpartsok.

Mari moduan bataiatu dugun Marijaiaren fibrazko figura bat gu guztion aurpegiz estali dugu, Aste Nagusiaren izaera kolektibo hori irudikatzeko. Aste osoan ibili gara, egunez egun, jendeari argazkiak egiten eta Mari-ren gainean itsasten, lehenengo argazkiak konpartsakide egunean jarri bagenituen ere.

Lana egun berean amaituta, argazkiz osatutako Mari hau aurkeztu genuen larunbat arratsean, oso ekitaldi alai eta hunkigarrian. Mari hau Bilboko euskal museoan egongo da ikusgai urtebetez, gu denon harrotasunerako!